Hodah kan nun Mawngtu (DRIVER) a si?
II Chanrelnak 24:2- Tlangbawi Jehoiada chan chung cu Joash nih Bawipa mithmuh i a dikmi kha a tuan.
Joash Siangpahrang nih Pathian mithmuh ah a dik mi kha a ṭuan timi tiang hi siseh law hi Siangpahrang pa tuanbia hi aa dawhtuk hringhran mi a si hnga. Asinain Bawipa mithmuh i a dikmi a tuah caan cu Tlangbawi Jehoiada a chanchung, a mah nih a hruai khawhchung tianglawng hi a si. Cucaah Joash a nun a mawngtu pa Tlangbawi Jehoiada a thih hnu ahcun Bawipa mithmuh i a dikmi a tuah ti lo mi hi a nunah a poi ngaingai ko.
II Chanrelnak 26: 5- Bawipa tihnak kha a cawnpiaktu Zekhariah chan ah khan, Pathian kawl kha aa sehchih i Bawipa a kawl chung vialte cu Pathian nih khuaawng a pemter.
Hihi Siangpahrang Uzziah nunnak a si ve. A nun a rak mawngtu taktak cu a a mah Pathian le a bia kha siloin a cawnpiaktu Zekhariah a si. Cupa chanchung cu Pathian kawl kha aa sehchih i a kawlchung vialte cu Pathian nih thluachuah a pek. Uzziah hi a nunchung vialte Pathian duhnak a kawlmi a si caah a nunchung khuaawng a pem ti siseh law a tuanbia zeitluk in dah aa dawh hnga i a tlin hnga. Pathian kong a cawnpiaktu Zekhariah chan tianglawng Pathian a kawl i cu caanchung lawng cu khuaawng a pem ve.
II Chanrelnak 29:2- A pa David nih a rak tuah bantuk khan amah nih Bawipa mithmuh i a dingmi kha a tuah.
Hihi Hezekiah siangpahrang pa nunnak a si. A nih tu cu midang nih a nun an mongh ruangah silo in a nunnak mawngtu Pathian a si caah a nunchung vialte Israel miphun an biaknak remh ṭhannak le Biakinn thlianh hlimh tu Siangpahrang ah aa cang. Bawipa mithmuh i a dingmi a tuah khawhnak cu a “Driver”, Pathian ruangah a si.
Nihin ah kan nun a kan mawngtu (Driver) a hodah a si? Kan pawngkam mi pakhatkhat, kan dawtbik mi kan kawp, kan nu le kan pa, kan khuami, kan pengtlangmi nih kan kalnak lam monghpiak mi kan si ahcun cu hna an nunnak a dih sual/ kan sinah an um ti lo tikah pingpang ah kan kal hrimhrim ko lai. Cucaah kan nun mawngtu (Driver) ah Bawipa Pathian tu si ko seh. A mah nih kan nun a mongh ahcun zeitlik hmanh ah kan pial sual lai lo, a kan hruai lai i a kan tinhpiak mi hmun a kan phak pi ko lai.
Pathian hi kan caah lam a kan chimtu, kan nun a kan hruaitu le kan mawngtu(driver) asi nak hnga . Pathian nih thluachuah in pek ko seh.
Biak Tha Hem
