Thlacam cu Pathian he bia i ruah a si

Cucaah Peter cu thong chungah khan an chiah ko, asinain Khrihfabu chungmi hna nih cun a caah khan thla fak piin an cam (Lamkaltu 12:5) 

Siangpahrang Herod nih hremnak fak ngaingai Khrihfabu cungah a rak tlun ter. Zultu Johan nau Jeim zong vainam in a rak thah ter hna. Cu nih cun Khrihfa a si lomi Judah mi an lung a rak lomh ter hna. Judah pawl an lunglomh ter le an lungton a duh caah Herod nih Peter zong a tlaih ter hna i thongah a thlak. Peter thong an thlak ahhin ralkap buli nih an cawngh; bu khat ah ralkap pali lengmang in chiah an si. Chimduh mi cu ralkap 16 bak nih a mah pakhat hi an congh tinak a si. Thongchung ah zan a ih tikah ralkap pahnih nih karceh in an ih ter. Thirhri pahnih in an hren i thonginn kutka cu ralvengtu nih an cawngh rih. Chuah khawh nak ding lam a um lo mi dirhmun ah a dir. Asinain Bawipa thawnnak cu thirhri le ralkap thawngthawng nak in a thawng deuh. 

Cu lio ahcun zumtu tampi hna cu Peter caah thla fak piin an cam. John Mark a nu Mary inn ah uktu hna ral ṭih ah inn kaa hrenh in hmunkhat teah an rak i pum ti hna i Pathian sinah lungtak tein Peter caah thla an rak cam. Zumtu hna thlacamnak hmual nih Peter luatnak lam a hun piak. 

Thongchung ah zeitluk hmanh in ralkap nih veng ko hna hmanh sehlaw Peter sinah Vancungmi a ra i aa hngilh ko mi Peter cu a ṭhangh. A thawh ter, a kut an ṭemnak thirhri vialte an tla dih, a taisawm sawmh ding le keden danh i puanaih dingin Vancungmi nih cun a fial. Ralkap nih a thapthap in an conghmi thonginn chung cun Peter cu an chuah pi. Thonginn kutka zong a mah ten a rak i ong. 

Thonginn chungin a chuah tikah zumtu hna thla an camtinak Johan Mark nu inn ah a rak phan. Inn kaa a kingh hna i sinum nu Roda nih inn kaa hun piak dingah a va kal. Peter aw a si a theih caah aa lawm tuk i thla a cammi zumtu pawl cu Peter a si tiah a chimh hna. A sinain zumtu pawl nih Roda cu “Na molh” tiah an rak ti. Peter luatnak ding caah thla an cam. Pathian thawnnak thawngin a luat taktak i an sin a rat tikah an rak zum lo. An cam nain an cammi a tling lai timi ruahchannak ngeih dawh an si lo. Hihi zumtu tampi kan nunnak ah a poi ngaingai tawnmi a si. 

Nihin zumtu hna zong Pathian sinah zumhnak in thla kan cam kan ti ko nain Pathian nih a tlin ter khawh ko timi a zumlo mi kan um kho men. Cun Pathian sinah kan halmi a tlin taktak tikah Pathian nih ka thlacamnak a ka leh ti a hngal ti lomi zumtu zong kan um kho men. 

Thlacam cu sertu Pathian he bia i ruah a si. Biaruah timi cu kamkhat lei lawng biachim a si bal lo. Kanmah nih Bawipa bia kan ruah caan a um awk a si bantuk in a mah nih bia a kan ruah mi kan ngeih caan zong a um ding a si ve. Cu lawnglawng ahcun biaruahnak tlam a tling kho mi a si. 

Peter caah thla a rak cammi zumtu hna hi an zumhnak a ṭhawngtuk, an i biatak ngaingai ko nain an mah lei lawngnih Pathian bia an rak ruah i Pathian nih bia a kan ruah ve, kan thlacam a kan leh ve ko timi an hmuh khawhcolh lo mi te hi nihin zumtu nang le kei ca zongah cawnpiak tu si ve hram seh. Nifatin Bawipa bia na ruah maw? Bawipa nih bia an ruah mi teh na ngai ve maw?

Bawipa he bia ruahmi kan si khawhnak hnga, fiannak kan pek hramseh law, Thluachuah kan pek ko seh.

Amen

B.T.H