Teimak Tein Thlacam
Pu Tluang Hnin cu Hniarlawn khua mi asi. Amah cu Salt Lake, Utah State, USA ah a chung le he khua an sa. Pathian aṭih ngai mi asi. Pathian nih arianṭuan dingah athim mi asi. “One City Of Missionary” ti, minput in Pathian rian aṭuan mi asi.Na Facebook page ah “Once City of Missionary” tiah typing na tuah ah cun an rianṭuanak, Pathian bia le hla tampi in hmuh le zoh khawh an si . Thlacam nun abiapit ning le teimak aherhnak in Pathian bia tawi kan ihrawm hna lai. Nihin ah kan ihrawm dingmi Pathian bia cu:
Tluang Hnin
Efesa 6:18
Hi vialte hi thlacam buin tuah u law Pathian kha bawmhnak hal u.
Thlarau nih an hruai hna ningin zeitik caan paoh ah thlacam u.
Hi caah timhcia tein um zungzal u law nan hnabei zeitikhmanh ah dong hlah u;
Pathian mi hna caah thlacam zungzal u.
Judah siangpahrang Herod nih Jesuh zultu Jeim a hngawng a tan i, Judah mi an lung a tlintuk caah Peter zong a tlaih i thong ah a thlak. Cu lio Jerusalem khua Khrifabu cu a no ngaingai mi an si rih caah awlawkchong vansang au in an um. Jeim le Peter cu an hruaitu an si. An i bochan ngaingai mi hna an si. Jesuh Khrih nih tuanvo a pektak mi hna lak ah bochanmi cu an mah pahnih le Johan an si. Atu cu Jeim a thi. Peter thong ah a tla. Zeitindah Khrifabu cu an um kun lai an ti ?
Harnak nih a kan den tawn ah hin minung lei kap in cun kan lung a dong tawn. Abik in mibu cawlcanghnak ah lung a dong tawn. Bochan mi hna nih a ruang tampi in a pingpang an suk tik ah kan lung a dong tawn. Zeitindah kan um lai tihi kan i halmi a si tawn.
Jerusalem Khrifabu zong hi an si ve ko. Asi nain lungdong ngai asimi an dirhmun kha an i teiter lo. An i pum i thlacamnak tu an ngei.
Siangpahrang Herod nih … Johan unau Jeim kha vainam in a thahter hna i, hi nih hin Judah mi kha an lung a lawmhter hna ti kha a hmuh tik ah Peter zong kha a tlaihter fawn hna. Cucaah Peter cu thong chung ah khan an chiah ko, asi nain Khrihfabu chungmi hna nih cun a caah khan thla fak piin an cam (Lam 12:1,2,5) Jerusalem Khrifabu nih hremnak a ton tik ah an hriamnam ṭhabik asi mi thlacamnak he an ral cu a ton.
Herod nih vawlei hriamnam he a fuh hna nain zumtu hna nih cunglei hriamnam he an fuh ve. Cucaah a donghnak tlamtlinnak cu Bawipa nih a hrawmh hna.
Ulenau hna, Tulio hi kan miphun nih biatak tein thlacamnak he kan ral kan fuh caan bak a si ve. Lungdong lo tein Bawipa hmai kawl caan bak a si. Teimak tein thlacam caan bak a si, cutik ah Bawipa nih kan miphun herhmi cu tlamtling tein a kan hrawmh hrimhrim ko lai.
Teimak tein thlacam nun angei kho mi kan si nak hnga Pathian nih thaw achuah hnawh abia cu kan caah tluchuah ah kan serpiak ko seh. Amen!
